Tottenham përjetoi një humbje turpëruese, ndoshta nga më turpërueset në historinë e tyre teksa u mposhtën me rezultatin 6-1 në transfertë nga Newcastle fundjavën që lamë pas.
Në 21 minutat e para, miqtë shënuan plot 5 gola duke bërë që stadiumi të boshatiset kokëulur. Tifozët që udhëtuan me kilometra përjetuan një zhgënjim të madh teksa skuadra e tyre mposhtej në mënyrë të turpshme duke dalë thuajse jashtë garës për zonën Champions.
Ditën e sotme, lojtarët kanë kërkuar falje dhe kanë vendosur t’u kthejnë mbrapsht paratë e biletave të shpenzuara.
“Si një skuadër, e kuptojmë frustrimin tuaj, zemërimin tuaj. Nuk ishim mjaftueshëm mirë. E dimë që fjalët nuk janë të mjaftueshme në një situatë të tillë porn a besoni, një humbje si kjo dhemb. Jemi mirënjohës për mbështetjen tuaj, në shtëpi dhe jashtë, dhe me këtë në mendje ne do të donim t’ju rimbursonim fansave koston e biletave të ndeshjes në ‘Saint James Park’.
E dimë që kjo nuk ndryshon atë që ndodhi të dielën dhe ne do të japim gjithçka për t’i bërë gjërat drejtë kundër Manchester United, mbrëmjen e së enjtes, përsëri, mbështetja juaj është gjithçka për ne. Së bashku, dhe vetëm së bashku, ne mund të ecim përpara.” – shkruhet në njoftimin e klubit.
