Kjo javë nuk ka qenë e zakontë në QKF “Kujtim Alija” pasi ka patur një pjesëmarrje masive të fëmijëve të shkollave të ndryshme të Shkodrës duke qenë se ka nisur faza e dytë e konkursit artistik për talentet në muzikë “Bilbilat”. Faza e dytë e këtij konkursi mendohet të zgjasë rreth 3 javë dhe në qendër do të paraqiten të gjithë fëmijët e talentuar, të përzgjedhur fitues nga faza e parë.Çdo ditë në QKF “Kujtim Alija” paraqiten 5 shkolla me fëmijët e talentuar të cilët po testohen para jurisë në formën “A cappella”.
Edhe këngëtarja dhe njëkohësisht mësuesja e muzikës Leonora Luca shpreh vlerësimin e saj për këta fëmijë dhe shton se ata nuk po ndikohen nga trendet e reja dhe disi të çuditshme të muzikës në kohën e sotme.
Ky do të jetë edicioni i XXVIII i konkursit “Bilbilat” që do ta kenë finalen e tyre në festën e luleve më 6 maj ndërsa fituesi dhe gjysmëfinalistët e konkursit fitojnë të drejtën për të qenë pjesë e korit të Festivalit Mbarëkombëtar të Këngës për Fëmijë.
