Protesta e zhvilluar për rrugën e Dukagjinit ka sjellë reagimin e bashkisë së Shkodrës që bëri përgjegjëse qeverinë e cila sipas nënkryetarit të bashkisë Tonin Dedaj nuk e ka parë më prioritet këtë segment rrugor. Numri dy i bashkisë së Shkodrës tha se ka informacione të sigurta se në vitin 2013 është tenderuar faza e parë e rrugës në kohën kur ishte drejtor i Fondit Shqiptar të Zhvillimit Benet Beci sot deputeti i Shkodrës, por ky fond sipas nënkryetarit të bashkisë nuk u alokua asnjëherë.
Pas kësaj deklarate ka reaguar deputeti Benet Beci i cili ka shprehur solidarizimin me kërkesën e banorëve për ndërtimin e rrugës. Sot në Shkodër pati një protestë me pjesëmarrje të madhe të banorëve e ish-banorëve të zonës së Dukagjinit para bashkisë e prefekturës, për rrugën e Dukagjinit. Dua të përshëndes të gjithë organizatorët dhe pjesëmarrësit për pjesëmarrjen e madhe dhe qytetarinë nga a cila u karakterizua e gjithë protesta.Jam plotësisht solidar me ta në kërkesën për ndërtimin e rrugës. Përgjatë viteve e kam përshkuar disa herë atë rrugë dhe duke patur përvojën e thuajse të gjitha rrugëve rurale të Shqipërisë besoj se është ndoshta më e vështira dhe më e rrezikshmja në vend.
Ndërkohë deputeti Beci thotë se po shikohet mundësia për financimin e rrugës me Qeverinë Shqiptare dhe donatorë të huaj.
Gjatë këtyre viteve është punuar për të përfunduar lidhjen rrugore Qafë Thore-Theth; po punohet për segmentin e rrugës Theth-Ndërlysaj dhe ka përfunduar plotësisht projekti i detajuar teknik nga Prekali në Ndërlysaj së bashku më një degëzim të rëndësishëm që lidh me Lekbibajn dhe zonën e Gjakovës në Kosovë.Kjo lidhje do të krijojë një unazë përfundimtare të Alpeve dhe do të jetë një mundësi për rivitalizimin ekonomik në zonë.
Sigurisht duke qenë një rrugë shumë e gjatë, e vështirë dhe malore, ka një kosto financiaretë konsiderueshme të investimit. Jemi duke parë të gjitha mundësitë për financimin e rrugës me Qeverinë Shqiptare dhe donatorë të huaj.Shpresoj që së shpejti do të kemi lajme të mira; kjo protestë sot vetëm më motivon shumë më tepër që rrugën të mund ta bëjmë realitet përfundon statusin deputeti Beci.
