Tre persona janë arrestuar ditën e sotme në flagrancë në një parcelë ku kishin kultivuar bimë të dyshuara narkotike në Pukë.
Me banim në Nikël të Krujës, babai, djali dhe nipi shkonin në Qafën e Malit, Pukë për të kultivuar bimët në një zonë të pyllëzuar.
Në kuadër të operacionit policor të koduar “Laku” në pranga ra L. S., 45 vjeç, djali dhe nipi i tij, përkatësisht 16 dhe 17 vjeç.
“Nga veprimet e kryera në kuadër të operacionit të koduar “Laku”, rezultoi se këta shtetas, në bashkëpunim me njëri-tjetrin, kishin kultivuar, në një zonë të pyllëzuar në vendin e quajtur “Laku i Palucajve”, në territorin e fshatit Qafë-Mali, 527 bimë të dyshuara narkotike kanabis, të cilat u asgjësuan me anë të djegies, ndërsa një sasi u sekuestrua në cilësinë e provës materiale,” njofton policia.
Shërbimet e Policisë, në bashkëpunim me Prokurorinë, po punojnë për identifikimin dhe arrestimin e personave të tjerë, të cilët mund të jenë të implikuar në këtë veprimtari kriminale.
Në cilësinë e provës materiale u sekuestruan dhe u dogjën qindra bimë kanabis.
Materialet i kaluan Prokurorisë pranë Gjykatës së Rrethit Gjyqësor Pukë, për veprime të mëtejshme, për veprën penale “Kultivimi i bimëve narkotike”.
