Egnatia arriti për herë të parë në finalen e Kupës së Shqipërisë dhe në përfundim të ndeshjes, trajneri Edlir Tetova u shpreh i lumtur dhe krenar për këtë sukses historik.
“Është emocion shumë i veçantë sepse bëhemi pjesë e historisë duke shkuar në finale për herë të parë. Kishte dy tablo. Pjesa e parë e nxituar nga ana jonë duke ditur që Vllaznia do të rrinte në mbrojtje. Në të dytën rregulluam gjithçka. Siç e patë ju, kishim mundësi të mira për të fituar dhe e arritëm.
Teuta-Tirana? Nuk kam një skuadër favorite por besoj se do të jetë Tirana dhe shpresoj ta kem në finale sepse më ka mundur 4 herë. Shpresoj të bëjmë mirë në finale. I kërkova çunave të rrinë në pozicione dhe të mos prishin ekuilibrat se do të vinte momenti. Këtë finale ia dedikoj futbollistëve nga i pari te i fundit.
Te të gjitha ndeshjet me Vllazninë, ka futbollistë të mirë siç edhe ne. Ky ekip është ndërtuar për 40 ditë. E kam ndërtuar sipas dëshirës time me lojtarët që më përshtaten dhe me bekimin e presidentit Agim Demrozi.
Premioja? Sinqerisht presidenti e ka pak zor ta thotë para por besoj do të kemi. Nuk e di sa është,” – tha Tetova për “Oversport”. /panoramasport
