Gjyqtarja e Gjykatës së Shkodrës, Izabela Radovani do të përballet të mërkurën më 12 prill me Komisionin e Pavarur të Kualifikimit. Procesi i saj i vetingut po kryhet nga trupa e përbërë nga Olsi Komici, Xhensila Pine dhe Firdes Shuli.
Izabela Radovani e ka nisur karrierën në sistemin gjyqësor në vitin 2000 dhe punon prej më shumë se dy dekadash si gjyqtare pranë Gjykatës së Rrethit Gjyqësor Shkodër.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet pasurinë familjare të deklaruar nga gjyqtarja Izabela Radovani nga viti 2003 deri në fund të vitit 2018. [Kliko për skedën në PDF].
Në deklarimin për herë të parë në vitin 2003, gjyqtarja Izabela Radovani deklaronte pasuri me vlerë 4.6 milionë lekë, ndërsa në fund të vitit 2018, pasuria familjare kap vlerën e 11.7 milionë lekëve.
Znj. Radovani zotëron familjarisht likujditete bankare me vlerë 9.2 milionë lekë, pasuri të paluajtshme në vlerën e 1.8 milionë lekëve, automjet me vlerë 433 mijë lekë si dhe kursime në cash prej 300 mijë lekësh.
Të ardhurat familjare për periudhën e deklarimit janë 37.3 milionë lekë, nga të cilat rreth 45% kanë si burim pagën e subjektit dhe 53% të ardhurat e bashkëshortit nga aktiviteti si noter.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 15 vite të deklarimit, asnjë prej deklaratave rezultoi me probleme./reporter.al/
